Almaniya Navalnının analiz nəticələrini Rusiyaya göndərməkdən imtina etdi

Almaniya xəstəxanasında müalicə olunan Rusiyanın müxalifət lideri Aleksey Navalnıdan götürülən analiz nəticələri Kimyəvi Silahların Qadağan olunması Təşkilatına (KSQT) təhvil verilib.

“Qafqazinfo” xəbər verir ki, bu barədə Almaniya Müdafiə Nazirliyi məlumat yayıb.

Almaniya hökumətinin sözçüsü Martina Fitz Berlinin bu məlumatları birbaşa Rusiyaya ötürmək üçün bir səbəb görmədiyini bildirib və Moskvanı hadisə ilə bağlı açıqlama verməyə çağırıb.

Qeyd edək ki, Rusiya KSQT-yə üzvdür.

Xatırladaq ki, 20 avqustda Tomsk-Moskva uçuşu əsnasında Navalnının vəziyyətinin pisləşməsilə təyyarə Omsk şəhərinə təcili eniş etmiş, siyasətçi təcili yardımla Omsk 1 nömrəli xəstəxanasına aparılmışdı. 22 avqustda isə o, yaxınlarının tələbi ilə xüsusi təyyarə vasitəsilə Berlinin “Şarite” klinikasına köçürülmüşdü.

7 sentyabrda klinika Navalnının süni komadan çıxarıldığını və vəziyyətinin yaxşılaşdığını açıqlamışdı.