Araz Ağalarovun yaxın qohumuna qarşı dələduzluq – 8,5 milyon…

Məlum olduğu kimi, koronavirusun geniş yayıldığı ölkələrdən biri də Rusiyadır. Bu ölkədə də hazırda tibbi maskalar və digər qoruyucu ləvazimatlar ya tapılmır, ya da işbazlar onu çox baha qiymətə satırlar. Rusiyanın life.ru saytı ilginc bir xəbər yayıb. Sayt məşhur azərbaycanlı iş adamı Araz Ağalarovun yaxın qohumu Səbinə Ağalarovanın dələduzluqla üzləşməsi barədə xəbər yayıb.

Xəbərdə iddia olunur ki, fırıldaqçılar Səbinə Ağalarovanın dələduzluq yolu ilə  8,5 milyon rublunu ələ keçiriblər.

Maraqlıdır ki, sayt biznes-ledini Ağalarovun qohumu kimi deyil, “məşhur müğənni Emin Ağalarovun bacısı Səbinə Ağalarova” kimi təqdim etməyə üstünlük verib. Əslində isə Eminin bu adda bacısı yoxdur. Onun əsil bacısı topdansatış ticarətlə məşğuldur.

Saytda iddia olunur ki, koronavirusla bağlı  vəziyyət pisləşməyə başlayanda, Səbinə şirkətinin işçilərini tibbi maskalarla təmin etməyə qərar verib.

“Mənbənin dediyinə görə, iş qadını uyğun bir şirkət tapıb və dəyəri 8,5 milyon dollar olan məhsul sifariş edib. Martın 20-də Ağalarova pulu həmin şirkətin hesabına köçürüb və həmin gün axşam saatlarında sifariş verilmiş tibbi ləvazimat ona çatdırılmalı idi. Amma şirkət nümayəndələri vəsaitin hələ hesaba köçürülmədiyini deyərək,  malları sabah gətirəcəklərini söyləyiblər”, deyə, məlumatda bildirilir.

Beləliklə, xanım Ağalarova tibbi ləvazimatları  ala bilməyib. Məlum olub ki,  “satıcı” şirkətin nümayəndəsi telefonlarını  söndürüb. İş adamı dərhal polisə şikayət edib, ancaq yoxlama yalnız 17 apreldə başlayıb.

Qeyd edək ki, Azərbaycanın xalq artisti Emin Ağalarov atasının rəhbərlik etdiyi “Crocus Group”un vitse-prezidentidir. Bu günlərdə Emin Ağalarov koronavirus şəraitində müflis olmaq riski barədə danışıb, şirkətə məxsus ticarət mərkəzlərinın gələnlərinin min dəfə azaldığını söyləyib.

O, koronavirus pandemiyasının uzun çəkəcəyi zaman kredit öhdəliklərini tam ödəyə bilməyəcəklərini əlavə edib.
“Ümid edirik ki, bu vəziyyət çox çəkməz. Çünki təhlükəsizlik yastığımız bir neçə həftəyə bəs edəcək. Bizdə 15 minə qədər işçi çalışır. Təkcə əmək haqqı fondu böyük rəqəm təşkil edir və gəlirimiz olmasa, faktiki olaraq, bu ödənişləri çox verə bilməyəcəyik”.

Bundan əlavə, sənətçi Bakı və Moskvada iki dəfə koronavirus testindən keçdiyini, cavabların neqativ çıxdığını qeyd edib.