Azərbaycan kinosundan bir əfsanə keçdi – Bu gün onun doğum günüdür
Azərbaycan kinosundan bir əfsanə keçdi – Bu gün onun doğum günüdür.
Yaşar Nuri 1951-ci il sentyabr ayının 3-də Bakıda tanınmış aktyor Məmmədsadıq Nuriyevin ailəsində dünyaya gəlib.
Minval.info bildirir ki, səhnəyə ilk dəfə 11 yaşında ADMKT-də “Toy kimindir?” tamaşasında Tapdıq rolunda çıxıb. Məktəbli vaxtlarında dövlət televiziyasının “Yelkən” verilişinin aparıcılarından olub.
Bundan başqa o, “Buratino”, “Qaranquş”, “Pioner” uşaq verilişi-teatrlarında müntəzəm iştirak edib. 10 yaşından Azərbaycan televiziyasında uşaq verilişlərində çəkilən və teatr səhnələrində uşaq rollarını ifa edən aktyor 1968-ci ildə Bakıdakı 173 nömrəli orta məktəbi bitirib, Azərbaycan Dövlət İncəsənət İnstitutunun dram və kino aktyorluğu fakültəsinə daxil olub.
Orada kurs rəhbərləri, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib. Tələbəlik dövründə “Sevil”də Balaş, “Toy”da Salmanov, “Günahsız müqəssirlər”də Neznamov və s. obrazlarını yaradıb.
1974-cü ildə Akademik Milli Dram Teatrının baş rejissoru Tofiq Kazımovun dəvətilə bu kollektivin aktyor truppasına qəbul olunub. Teatr aktyoru kimi görkəmli sənətkar olan Yaşar Nuri həm də məşhur kino ustasıdır. Onun böyük populyarlıq qazandığı çoxlu ekran obrazları var. Əlliyə yaxın bədii filmə çəkilib.
“Alma almaya bənzər”, “Yol əhvalatı”, “Bəyin oğurlanması”, “Ölsəm, bağışla”, “Qətl günü”, “Mənim ağ şəhərim”, “Ağ atlı oğlan”, “Yoxlama” və s. kimi məşhur filmlərdə sevilən rolları ilə yadda qalıb.
2012-ci ildə onu itirdik…
Yaşar Nuri 2012-ci il 12 noyabrda uzun müddət xəstəliklə mübarizə apardıqsan sonra dünyasını dəyişib.
Allah sənətkara rəhmət eləsin!
Minval.İnfo
