Binəqədidə məcburi köçkünlər aksiya keçirib – SƏBƏB

Bakıda məcburi köçkünlər etiraz aksiyası keçirib. Aksiya Binəqədi rayonunun 9-cu mikrorayon ərazisində baş tutub.

Şahidlərin Minval.info-ya verdiyi məlumata görə, hadisə yerinə PPX maşınları, polis əməkdaşları və mülki geyimlilər gəlib. Onların müdaxiləsindən sonra aksiyanın qarşısı alınıb.

Məlumata görə, məcburi köçkünlər məskunlaşdığı binanın sökülməsi xəbərinə etiraz ediblər. Bu səbəbdən ötən gecə onlar yolu bağlayıblar.

Saxlanılanların olub-olmaması barədə dəqiq məlumat verilmir.

Minval.info-nun əməkdaşı məsələ ilə əlaqədar hadisə yerinə gedib. Məlum olub ki, aksiya bitməsinə baxmayaraq ərazidə 4 PPX maşını dayanıb. Bununla yanaşı, orada polis əməkdaşı ilə mülki geyimli şəxs “Niva” markalı avtomobilin içərisindən gecə boyu ərazini müşahidə edib. Əməkdaşımız binanın qarşısında yüksək rütbəli polis zabitinin keşik çəkdiyinin də şahidi olub.

Məsələni diqqətdə saxlayacağıq.

Samir Mirzə
Minval.info