Çin hökuməti restoranlardan İslam rəmzlərini yığışdırır: “Halal” sözünü sildirirlər…
Çin hökuməti illərdir uyğurlara təzyiq gösətir. Asiya dövlətinin hakimiyyəti indi də İslamı xatırladan hər şeyə qarşı mübarizəyə başlayıb.
Bizimyol.info xəbər verir ki, Çində restoranlardan İslam rəmzlərini və ərəbcə sözləri yığışdırırlar. Xüsusilə sahibkarları “halal” ifadəsini silməyə məcbur edirlər. Restoranlardan birinin meneceri jurnalistlərə deyib ki, hökumət nümayəndələri bunun əcnəbi mədəniyyəti olduğunu bildirir.
“Reuters”in məlumatına görə, 2016-cı ildən Çin hakimiyyəti ölkədə belə siyasət yürüdür. Başqa dinlərə qarşı xoş olmayan münasibət müşahidə edilir. Hətta xristian rəmzlərini də yığışdırırlar. Bununla bağlı kilsələrə xüsusi xəbərdarlıq edilib. Yəni xristianlığın təbliğatı ilə məşğul olmamalıdırlar.
Müsəlmanlara qeyri-adekvat münasibət daha çox uyğurlara təzyiqdə özünü göstərir. Onlar üçün xüsusi düşərgələr yaradılıb. Azacıq etiraz edənləri həmin düşərgələrə yerləşdirirlər.
Əvvəlcə rəsmi Pekin bu faktı inkar edirdi. İndi isə düşərgələrin yaradılmasını belə izah edirlər ki, adamların sosial həyata uyğunlaşmasına və terrora meylli şəxslərin tərbiyələndirilməsinə bu yolla nail olmaq mümkündür.