DİN Tofiq Bəhramov stadionunda baş verən su qalmaqalına aydınlıq gətirdi
Bir neçə gün öncə “Qarabağ” Sloveniyanın “Olimpiya” komandasını Tofiq Bəhramov adına Respublika Stadionda qəbul edib.
Matçın nəticəsi hər kəsi məmnun etsə də, qarşıdurmanı stadionda canlı izləyən azarkeşlərin xoşagəlməyən situasiyalarla qarşılaşıblar. Onlar kənardan aldıqları suları stadiona keçirə bilməyiblər. Polis əməkdaşları onlara mane olub. Bununla bağlı daha öncəki yazımızda məlumat vermişdik.
Minval.İnfo xəbər verir ki, DİN-nin mətbuat xidmətindən məsələyə aydınlıq gətirilib. Bildirilib ki, bütün bunlar təhlükəsizliklə bağlı görülən tədbirlədir:
“Bu, stadion rəhbərliyinin göstərişi deyil. Bütün görülən işlər birincisi stadionda olan insanların təhlükəsizliyi baxımından, ikincisi isə FİFA-nın qərarlarına və beynəlxalq normalara əsasəndir. Biz də beynəlxalq normalara uyğun davranırıq. Stadiona müxtəlif şüşə, plastik qablarda su keçirilməsi düzgün deyil. Ancaq, bununla belə insanlar da susuz qalmır. Oyun boyu insanlara plastik qablarda sular təklif olunur və azarkeşlər içəridə verilən sudan istifadə edə bilirlər. Kənardan gətirilən plastik qabda olan mayeni bir-bir yoxlamaq texniki olaraq mümkün deyil. Buna görə də, belə qərara gəlinib ki, kənardan mayenin gətirilməsi dayandırılırsın. Yalnız stadionun daxilində verilən sular buraxılsın. Bütün azarkeşlərə məsləhət görürük ki, bu qaydalara riayət etsinlər”.
Minval.İnfo