“Dinamo” bir futbol klubundan daha çox şey deməkdir” – Mahir Emreli

Xorvatiyanın “Dinamo” klubuna transfer olunan Mahir Emreli təəssüratlarını bölüşüb.

Minval.İnfo xəbər verir ki, Azərbaycan millisinin hücumçusu Zaqreb təmsilçisinin rəsmi saytına danışıb:

“Dinamo” ilə müqavilə bağladığım üçün çox şadam. Bu, həmişə Xorvatiya çempionu tituluna sahib çıxan və Avropanın böyük turnirlərinin qrup mərhələsində oynayan klubdur. Son vaxtlar bu mənada daha böyük inkişaf nəzərə çarpır. “Dinamo” nəinki Xorvatiyada, onun sərhədlərindən kənarda da məşhurdur. Yüksək səviyyəli, ciddi klubda olmaq əlavə məsuliyyətdir.

Öz oyunum, məsuliyyətim və meydanda qoyacağım bütün gücümlə kollektivin uğurlarında pay sahibi olmaq istəyirəm. İnanıram ki, bu mövsüm çempion titulunu qoruyacaq və ardından Avropada sözümüzü deyəcəyik.

“Dinamo” bir futbol klubundan daha çox şey deməkdir. Formasını geyinəcəyim klub Zaqrebin və Xorvatiyanın rəmzidir. Seçimimdə sadaladığım məqamların da az rol oynamadığını deməliyəm. Böyük azarkeş ordusuna malik “Dinamo” üçün bacardığımın ən yaxşısını edəcəyimə söz verə bilərəm”.