Doğuş zamanı ölümlərə görə baş həkim və 11 tibb işçisi işdən çıxarıldı
Səhiyyə Nazirliyində Azərbaycanda doğuşayardım xidmətinin vəziyyəti və 2018-ci ilin səkkiz ayı ərzində riskli hamiləlik və doğuş hallarının təhlilinə həsr edilmiş geniş kollegiya iclası keçirilib.
Nazirliyin mətbuat xidmətindən “Minval.İnfo”ya verilən məlumata görə, səkkiz ay ərzində ümumi doğuşun 0,015% ölümlə nəticələnib.
Ana ölümlərinə səbəb kəskin qan itirmə, ağciyər-ürək-damar çatışmazlığı, anestezioloji qüsur olub.
Bildirilib ki, işlərində yol verdikləri nöqsanlara görə 11 tibb işçisi tutduğu vəzifəsindən azad edilib: bir baş həkim, bir Regionlal Perinatal Mərkəzinin direktor vəzifəsini icra edən, üç nəfər həkim mama-ginekoloq, üç nəfər həkim anestezioloq-reanimatoloq, bir nəfər həkim-cərrah, iki nəfər orta tibb işçisi.
Digərlərinə qarşı müxtəlif inzibati cəza tədbirləri görülüb və təkmilləşmə kurslarına göndərilib.