Ekspert İTV-ni tənqid etdi
Azərbaycan İnternet Forumun prezidenti Osman Gündüz AzTV və İTV-nin birləşdiriləcəyi ilə bağlı səsləndirilən fikirlərə münasibət bildirib.
Minval.info xəbər verir ki, mütəxəssisin sözlərinə görə, son dövrlərdə Prezident tərəfindən dövlət sektorunda optimallaşdırma və idarəetmənin təkmilləşdirilməsi, büdcə xərclərinə qənaət istiqamətində atılan addımlar baxımından bu məsələ daha da aktuallaşıb:
“Xatırlayıram ki, teleradio fəaliyyəti və İTV ilə əlaqəli qanunvericilik aktları müzakirə olunanda bu məsələ də ciddi müzakirə predmetinə çevrilmişdi. Hazırda AzTV-də islahatların, müəyyən dəyişikliklərin aparıldığı bildirilir.
Təəssüf ki, İTV hələlik gözləntiləri doğrultmayıb. İTV-nin “qızıl dövrünü” indiyədək nəinki qaytarmaq, heç yaxınlaşmaq mümkün olmayıb.
Yeni rəhbərlik gələndən, Yayım Şurası yenilənəndən sonra sadəcə “Xəbərlər” proqramına və studiyalara bir az əl gəzdirilib”.
Osman Gündüz qeyd edib ki, qanunvericiliklə İTV qarşısına qoyulan vəzifələrin icrası və prinsiplərə əməl edilməsi sahəsində ciddi problemlər qalmaqdadır:
“Plüralizm prinsipinə əməl etmək isə ümumiyyətlə yaddan çıxıb. Hərdən mənə elə gəlir ki, AzTV bu baxımdan daha öndədir”.
Onun sözlərinə görə, hazırda dövlət başçısı tərəfindən aparılan islahatlara dəstək baxımından ciddi müzakirələrin aparılması, aktual polemikaların təşkili, maraqlı tərəflərin iştirakı ilə diskussiyaların aparılmasına ehtiyac var:
“Parlamentin, vətəndaş cəmiyyətinin və biznes sektorunun bu islahatlarda iştirakı və dəstəyi ilə bağlı, verə biləcəyi töhfələrlə bağlı efirdə faydalı bir şey tapmaq çox çətindir.
Təəssüf ki, bu tip müzakirələr hələlik yalnız sosial mediada aparılır. AzTV və İTV -yə dövlət büdcəsindən xeyli vəsaitlər ayrılır. Ümid edirəm, ölkədə KİV siyasətini müəyyən edənlər efir məkanın canlandırılmasına, dövlət büdcəsindən maliyyələşən TV-lərdə zəruri islahatların aparılmasına ciddi diqqət yetirəcəklər”.