Ermənistanda yeni prezident seçildi – O KİMDİR?
Martın 2-də Ermənistan parlamenti ölkənin yeni prezidentini seçib. Minval.İnfo-nun Novator.az-a istinadən verdiyi məlumata görə, yeganə namizəd Armen Sərkisyan gizli səsvermədə 90 deputatın səsini toplayıb. 10 deputat onun əleyhinə səs verib.
Yalnız dövlət başçısı funksiyası daşıyan prezidentin səlahiyyət müddəti 7 ildir. Bir şəxsin yalnız bir dəfə prezident seçilmək hüququ var. Səlahiyyət müddətində prezidentin partiya üzvü olması qadağandır.
Armen Sərkisyanı hakim fraksiya namizəd irəli sürüb. Fraksiyaya Respublika Partiyası (105 mandatdan 58-nə sahibdir) və Daşnaksütun Partiyası (7 mandatı var) daxildir. 31 mandatı olan Sarukyan bloku da Armen Sərkisyana dəstək verib. 9 mandatı olan “Çıxış” bloku namizəd göstərə bilməyib. Bunun üçün 27 deputatın dəstəyi tələb olunur.
2008-ci ildən Ermənistan dövlətinə başçılıq edən Serj Sərkisyanın prezident postunda səlahiyyət müddəti bu il aprelin 9-da başa çatır. Həmin gün ölkə tam parlament idarə üsuluna keçəcək, icra hakimiyyətinə baş nazir rəhbərlik edəcək.
A. Sərkisyan 1953-cü ildə İrəvanda anadan olub. İrəvan Dövlət Universitetinin (İDU) fizika-riyaziyyat fakültəsini və aspiranturasını bitirib. Fizika-riyaziyyat elmləri namizədidir.
1978-ci ildən İDU-da müəllim işləyib. 1984-1985-ci illərdə Böyük Britaniyanın Kembric Universitetində çalışıb. 1985-ci ildə Ermənistana qayıdıb və İDU-da fəaliyyətini davam etdirib.
Sərkisyan 1992-1995-ci və 1998-2000-ci illərdə Ermənistanın Böyük Britaniyadakı səfiri olub. 2013-cü ildən yenidən bu ölkədə səfir idi.
O, müxtəlif illərdə Ermənistanı Avropa İttifaqında, Belçika, Niderland, Lüksemburq və Vatikanda səfir kimi təmsil edib.
Yeni prezident 1996-cı ilin noyabrından 1997-ci ilin fevralınadək Ermənistanın baş naziri olub.