“Körpə üçün ən qorxulu yer ana bətnidir” – Elza

“Abort günahdır, cahillikdir. Övlad üçün ən qorxulu yer ana bətnidir. Çünki körpə 9 ay ərzində qorxu və həyəcan keçirir. Düşünür ki, anam məni necə dünyaya gətirəcək?”.

“Qafqazinfo” xəbər verir ki, bu sözləri Əməkdar artist Elza Seyidcahan “VarYox” adlı “Youtube” layihəsinə qonaq olarkən deyib.

Müğənni-bəstəkar video-rolikdə sosial problemlərdən danışıb, dünya ulduzlarının yaratdığı kampaniyalardan söhbət açıb:

“Dünya ulduzları dünyanı çirkləndirməsinlər, qorumaqları lazım deyil. Diqqət yetirin, onlardan biri narkotikdən, gey olduğundan, digəri spirtli içkidən ölüb. Dünyanı çirkləndirməsinlər ki, düzəltməyə ehtiyac olmasın. Biz müğənnilər xalqa örnək olmalıyıq. Mən əminliklə deyirəm ki, tamaşaçımın zövqünü pozmamışam. Söhbət mentalitetdən gedir. Yoxsa ki, elan edək ki, biz beləyik.

Avropadan bizə gələn yersiz şeylər var. Toxluqdan, problemsizlikdən nümayişlər keçirirlər. Məsələn, heyvanımızın dırnağını manikur etmək lazımdır, bunun üçün mitinq edək. Mən nə qədər müasirəmsə, bir o qədər millətçiyəm”.

Bundan əlavə, Elza elektronik musiqi barədə fikirlərini də bölüşüb: “Elektronik musiqi şeytani musiqidir. Bu yenilik deyil, müvəqqətidir. Gecə klublarında ye-iç, sonda da xəta törət get. Bu, onun üçündür. Xarici ölkələrdə də oluram, belə klublara getmirəm. Qoca da deyiləm, 18 yaşımda da getməmişəm”.