Onlarla Bakı sakini eyni fırıldağın qurbanına çevrilib – Bu işdə dövlət qurumunun əli var? (VİDEO)

“Durduq yerdə bu plomblar niyə qırılır? Qırıldığı gün “Azərqaz” gəlir, cərmələyir.”

Minval.info xəbər verir ki, ötən gün “Space” TV-də yayımlanan “Olar? Olmaz!” verilişində maraqlı anlar yaşanıb.

Proqramda müəmmalı məqamlar ortaya çıxıb. Bakının müxtəlif qəsəbələrində qaz sayğaclarının plomblarının qırılmasından danışan sakinlər şikayətlərini dilə gətiriblər.

Onların sözlərinə görə hər həftə sayğaca smart-kartla balans yükləyiblər. Bu zaman sayğacın üzərində plomb olub. İki gün sonra “Azərqaz” ASC-nin əməkdaşları gəlib və cərimə yazıb ki, plomb qırılıb.

Sakinlər sual edib ki, illərlə bura gəlməyən əməkdaşlar bir gün içərisində necə ortaya çıxdılar? Digər iddiaya görə, plombun “Azərqaz”ın əməkdaşları tərəfindən qırılıb: “Mən ona sübut edə bilmədim ki, plombu sən qırdın”.

Məsələ ilə bağlı “Azərqaz” ASC-nin mətbuat xidmətinin rəhbəri İbrahim Kərbalayev baş verilənlərin və iddiaların araşdırılacağını qeyd edib.

Qeyd edək ki, veriliş efirə getdikdən sonra onlarla vətəndaş telekanala zəng vuraraq eyni hadisə ilə qarşılaşdıqlarını deyiblər.

Xatırladaq ki, veriliş həftə içi hər gün saat 19:55 də Amil Xəlilin təqdimatında “Space” TV-də yayımlanır.

Minval.info