Pəncşirdə internet və telefon əlaqəsi bərpa edilib

Əfqanıstanda “Talibana” müqavimət göstərən qüvvələrinin cəmləşdiyi Pəncşir əyalətində internet və telefon əlaqəsi bərpa olunub.

Minval.info xəbər verir ki, bu barədə “Al Arabiya” telekanalı məlumat yayıb.

Əyalətdə internet və telefon əlaqəsi ölkədə hakimiyyəti ələ keçirən “Taliban” tərəfəindən dayandırılmışdır.

Xatırladaq ki, taliblərin hakimiyyəti ilə razılaşmayan qüvvələr Pəncşirdə məşhur səhra komandiri Əhməd Şah Məsudun oğlu Əhməd Məsudun rəhbərlik etdiyi müqavimət təşkil ediblər. Əşrəf Qaninin ölkəni tərk etməsindən sonra özünü müvəqqəti dövlət başçısı elan edən vitse-prezident Əmrullah Saleh də müqavimətçi qüvvələrə qoşulub.

“Taliban”la onlar arasında danışıqlar aparılsa da, razılığa gəlinməyib.