“Putin qatildir” deyən jurnalist yenidən saxlanıldı – FOTO

Rusiyanın Birinci Kanalının keçmiş əməkdaşı Marina Ovsyannikova müxalif siyasətçi İlya Yaşinin işi ilə bağlı çıxışna görə saxlanılıb.

Bakupost.az Rusiya KİV-ə istinadla xəbər verir ki, Ovsyannikovanın vəkili Dmitri Zaxvatov ona qarşı ordunun nüfuzdan salınması maddəsi ilə inzibati qaydada iş açılıb.

“İlya Yaşinin işi ilə bağlı çıxış edən Marina Vladimirovna bir daha müharibə əleyhinə mövqeyini ifadə etdi. Həbsə də bu çıxış səbəb olub”, – deyə vəkil Zaxvətov bildirib. Vəkilin sözlərinə görə, İnzibati Xətalar Məcəlləsinə əsasən, Ovsyannikova 30 000-dən 50000 rubla qədər cərimələnə bilər.

Ovsyannikova özü də polis idarəsini tərk etdikdən sonra sosial şəbəkədə saxlanmasına münasibət bildirib. O, bunu “ilk Çin xəbərdarlığı” adlandırıb.

Xatırladaq ki, Ovsyannikova martın 14-də axşam Birinci Kanalın xəbərlər proqramı zamanı teleaparıcı Yekaterina Andreevanın arxasında dayanaraq, kadra daxil olub, plakat açaraq müharibə əleyhinə şüarlar səsləndirib. Efirə çıxmazdan əvvəl jurnalist Rusiyanın Ukraynadakı “xüsusi hərbi əməliyyatını” pisləyən videomüraciət yazıb və “qardaş xalqların hələ də barışa biləcəyinə” ümid etdiyini bildirib. Martın 15-də Ostankino məhkəməsi razılaşdırılmamış aksiyanın təşkili maddəsi ilə onu 30 min rubl cərimələyib. Bundan sonra o, Almaniyada işləmək üçün ölkəni tərk edib. Ovsyannikova bu yaxınlarda Rusiyaya qayıdıb və bunu ailə vəziyyəti və müqavilənin bitməsi ilə izah edib. İyulun 15-də o, Kreml yaxınlığında təkbaşına müharibə əleyhinə aksiya keçirib. Onun əlində tutduğu posterdə belə yazılmışdı:

“Putin qatildir. Onun əsgərləri faşistdir. 352 uşaq ölüb. Siz dayanana qədər daha neçə uşaq ölməlidir?”