“Qarabağ Azərbaycanın tarixi ərazisidir” – Gürcüstanlı futbolçu

Əslən Gürcüstandan  olan, “Azal” futbol klubunun yarımmüdafiəçisi Nuqzar Kvirtiya Qarabağ cəbhəsində yaşananlara münasibət bildirib.

Minval.info xəbər verir ki, futbolçu sosial şəbəkədə Azərbaycanın erməni hücumuna məruz qaldığını, öz torpaqlarını azad etmək uğrunda döyüşdüyünü yazıb:

“Artıq 11 ildir ki, Azərbaycan torpağında gəzirəm və Azərbaycanı ikinci vətənim hesab edirəm. Qızımız Qabi Bakıda anadan olub. Burada öz işimi qurdum və ən yaxşı futbol karyeram Azərbaycana aiddir. 1992-ci ildə ailəmlə mən evimizi tərk edib müharibədən qaçmağa məcbur olduq. O müharibədə bir-birinin ardınca həlak olan qonşularımı xatırlayıram, tankları xatırlayıram, evimizə necə atəş açdıqlarını, keçdiyimiz yolu xatırlayıram, uşaq idim, amma hadisələr yaddaşıma yazılıb. Müharibəyə, qan tökülməsinə qarşıyam.

Azərbaycanın təcavüzkar olduğunu düşünən bütün dostlarıma səslənirəm: Azərbaycan təcavüzdən çox uzaqdır.

Aşağıda Qarabağla bağlı vəziyyəti daha yaxşı başa düşməyə kömək edəcək faktları sadalayıram:

Qarabağ Azərbaycanın tarixi və rəsmən tanınmış ərazisidir. İndi müharibə Ermənistan ərazisində aparılmır və Azərbaycan ordusu kiminsə torpaqlarını ələ keçirməyə çalışmır.
Azərbaycan 30 il əvvəl ərazilərini azad edə bilərdi.

Ancaq 1994-cü ildə tərəflər atəşkəs sazişi imzaladılar və münaqişənin ATƏT-in Minsk qrupunun köməyi ilə həllinə çalışıldı. Ancaq bu illər ərzində İrəvan işğal olunmuş ərazilərin sülh yolu ilə azad edilməsi üçün tədbirlər görməyib.

Azərbaycan həmişə münaqişənin sülh yolu ilə həllinin tərəfdarıdır. Ancaq 27 sentyabr 2020-ci ildə Azərbaycanda cəbhə bölgəsindəki mülki əhali atəşə tutuldu. Hər şey bundan sonra başladı”.