Qul kimi satılan futbolçular – Stadionda yatıb, orada yemək yeyiblər – FOTO
Qanuna əsasən 18 yaşından kiçik futbolçuların pul qarşılığında transfer edilməsi qadağandır.
Ancaq BBC-in faktları üzə çıxarmasından sonra FİFA-nın (Beynəlxalq futbol federasiyaları assosiasiyası) araşdırması ilə 2015-ci ildən bəri qul kimi saxlanılan futbolçular tapılıb.
Belə ki, 14 yaşından kiçik futbolçular pul müqabilində başqa ölkələrə satılıb. 2015-ci ildə 30-dan çox afrikalı uşaq futbol akademiyasında təhsil almaq adı ilə Laosa gətirilib.
Minval.info xəbər verir ki, satıldıqlarından xəbərsiz uşaqlar müqavilələrə imza atıblar və onların bütün sənədləri əllərindən alınıb. Burada uşaqlara qalacaq yer və gündəlik yemək veriləcəyi vəd edilib. Ancaq onlar yerlə təmin edilməyib və stadiondakı paltar dəyişmə otaqlarında 30 nəfər birlikdə yatıblar. Onların düzgün qidalanmadığı da bildirilir.
Məsələni araşdıran jurnalist Ule Bedelin uşaqların yerləşdirildiyi “Champasak”ın əslində futbol akademiyası olmadığını müəyyən etməsindən sonra FİFA rəsmiləri buraya basqın həyata keçiriblər.
17 azyaşlı futbolçu öz ölkələrinə geri qayıdıblar. Onların sözlərinə görə, pasportları əllərindən alındığı üçün qeyri-qanuni miqrant sayıldıqlarından küçəyə də çıxa bilməyiblər.
Əsl qul kimi saxlanan futbolçular bunun nə ilk, nə də son olduğunu deyiblər. Çünki FİFA-nın da xəbərdar olmadığı, gözlərdən uzaq qalmış bir çox yerdə futbolçuların kölə kimi satışı davam edir.
Bu hadisədən sonra FİFA Laos futbol federasiyasına 700 min dollardan çox pul cəzası verib.
Minval.info