Ronaldodan inanılmaz uğur: futbol tarixinə düşdü
“Yuventus” İtaliya A Seriyasında növbəti çempionluğunu elan edib.
“Fiorentina”nı 2:1 hesabı ilə yenən Turin klubu mövsümün sonuna 5 tur qalmış ardıcıl 8-ci çempionluğunu rəsmiləşdirib.
Bununla da “Yuventus” “Lion”un 2001/02-2007/08 mövsümünlərində imza atdığı rekordu qırıb. Fransa klubu həmin illərdə ardıcıl 7 dəfə Liqa 1-in qalibi olmuşdu. “Yuventus” isə “böyük beşlik” çempionatlarında ardıcıl 8 dəfə çempion olan ilk klub kimi tarixə düşüb.
Turin klubunun ulduzu Kriştiano Ronaldo da yeni bir rekorda imza atıb. Mövsümün əvvəlində “Real”dan “Yuventus”a 117 milyon avroya transfer olunan portuqaliyalı futbolçu 3 böyük liqada çempion olan ilk futbolçu olub.
Ronaldo bundan əvvəl İngiltərə Premyer Liqasında 3, İspaniya La Liqasında 2 dəfə çempion olmuşdu. O, bu uğurunu İtaliya A Seriyasında da davam etdirib.
Qeyd edək ki, Ronaldo bu mövsüm A Seriyasında oynadığı 27 oyunda 19 qol vurub və 8 məhsuldar ötürmə edib.
Fanat.Az