Rusiyanın kömür rəngli günləri başlayır – Əlavə 4 milyardlıq ziyan
“Məlum olduğu kimi, Avropa İttifaqı Rusiyadan kömür alışına və onun tranzit daşımalarına qadağa qoyub. Qeyd edim ki, daş kömürünün ixracatı Rusiyaya təqribən ildə 6 milyard dollara yaxın əlavə gəlir gətirirdi. Bunun 4 milyardı Avropa ölkələrinin payına, 2 milyardı Çinin payına düşür. Hazırda Rusiyadan Çinə kömür idxalı dayandırılmayıb. 2021-ci ildə Çin 300 milyon ton kömür idxal edib və Rusiya kömürünü almaqda maraqlıdır. Ancaq Avropa Birliyi ölkələri Rusiyadan kömür alışını dayandırıb. Bu da Rusiyaya əlavə 4 milyard dollar ziyan vuracaq. Ancaq islanmışın yağışdan nə qorxusu? Tətbiq edilən sanksiyalar səbəbindən Rusiyanın o qədər itkiləri var ki”.
Bu fikirləri Bakupost.az -a açıqlamasında iqtisadçı ekspert Natiq Cəfərli deyib. Ekspert bildirib ki, Çinlə yanaşı Rusiya kömürü Hindistana da satmağa çalışacaq:
“Rusiya vəziyyətdən çıxış yolu kimi ölkədən kömürün ixrac marşrutunu dəyişəcək. Rusiya Avropa almadığı kömürü satmaq üçün yeni bazarlar tapmaq məcburdur. Hazırda başqa çıxış yolu yoxdur”.
Natiq Cəfərli qeyd edib ki, kömür sənayesi Rusiyada məşğulluğun təminatına xüsusi dəstək verən əsas sahələrdən biridir. İxracatın minimumlaşdırılması səbəbindən iş yerlərinin azalması qaçılmazdır.