Təhsil Nazirliyindən yenilik: 6 yaşı tamam olmayan uşaqlar da məktəbə qəbul olunacaq
“Artıq 6 yaşı tamam olmayan uşaqlar da məktəbə qəbul olunacaq”.
Musavat.com bildirir ki, bu barədə Təhsil Nazirliyinin aparat rəhbərinin müavini Fərzəli Qədirov jurnalistlərlə keçirilən brifinqdə bildirib. Nazirliyin rəsmisi qeyd edib ki, hər təhsil ilinin sonunadək 6 yaşı tamam olmayan uşaqlar yalnız valideynlərinin müraciəti əsasında qəbul olunacaq:
“Bildiyiniz kimi “Təhsil haqqında qanun”da əhəmiyyətli dəyişikliklər olunub. Ümumilikdə qanunun 21 maddəsinə 60-dan çox dəyişiklik edilib. 2 yeni maddə əlavə olunub. Onlardan biri də hər ilin sonunadək 6 yaşı tamam olmayan uşaqların məktəbə qəbul olunmasıdır. Bu təcrübə əvvəllər də var idi.
Artıq sentyabrın 15-dək 6 yaşı tamam olanlarla yanaşı xüsusi komissiyanın əsasında 6 yaşı tamam olmayan uşaqların da məktəbə qəbulu ilə bağlı dəyişiklik edilib. Həmin uşaqlar yalnız valideynlərin müraciəti əsasında məktəblərə qəbul ediləcəklər. Buna görə də bu proses kütləvi xarakter daşımayacaq.
Ötən il 6 yaşı tamam olmayan uşaqları yoxladıq, nəticə olaraq gördük ki, həmin uşaqlar da digər uşaqlar kimi suallara cavab verə bilir”.
Musavat.com