Türkiyə şirkəti “Bayraktar”lara görə Ukraynadan pul almadı, üç PUA pulsuz veriləcək

Türkiyənin pilotsuz təyyarə (PUA) istehsalçısı “Baykar”şirkəti Ukrayna xalqının yeni “Bayraktar”lar alınması üçün həmrəylik nümayiş etdirib olduqca tez bir zamanda vəsait toplamasına görə, xoş niyyət göstərərək döyüş dronlarının 3-nü bağışlamağa qərar verib.

Musavat.com xarici agentliklərə istinadən xəbər verir ki, bu barədə istehsalçı “Baykar” şirkətinin rəsmi twitter səhifəsində açıqlama yayılıb.

“Baykar” şirkəti yeni “TB2 Bayraktar”lar üçün ödənişi qəbul etməyəcək və 3 İHA-nı Ukrayna cəbhəsinə pulsuz göndərəcək. Biz xahiş edirik ki, toplanan vəsait Ukrayna xalqının mübarizəsində kömək üçün istifadə edilsin. Biz bu həmrəylikdən və çətinliklər qarşısında verilən mücadilədən mütəəssir olduq”,-deyə şirkətin bəyanatında bildirilib.

Xatırladaq ki, bundan öncə ukraynalı teleaparıcı Sergey Pritula və blogger İqor Laçenkov ölkə vətəndaşlarından üç “Bayraktar” PUA-sının alınması üçün 450 milyon qrivna (20 milyon 500 min ABŞ dolları) vəsait toplamaqla bağlı müraciət etmişdi. Həmin müraciətdən sonra ölkə daxilində cəmi 3 gündə 4 ədəd “Bayraktar”a yetəcək qədər pul yığılmışdı.