“Youtube”dan sərt qadağa – o kanallara daha reklam verilməyəcək!
“Youtube” bəzi kanallara artıq reklam verməyəcəyini açıqlayıb. Bu qərar tibbi peyvəndlərlə bağlı yalnış məlumatlar paylaşan, əsassız tezislərə yer verən kanallara aiddir.
BBC-də yer alan məlumata görə “Youtube” şirkəti bu cür kanalların çox təhlükəli və zərərli məlumatlarla bağlı video paylaşaraq və bunun üzərindən reklam gəliri əldə etmələrini məhdudlaşdıracağını xəbərdarlıq edib. Həmçinin tibbi peyvəndlərlə bağlı həqiqəti əks etdirən videolara daha çox yer verilməsinə çalışacağını bildirib.
Şirkət onu da qeyd edib ki, məlum videolar resursdan qaldırılmayacaq, sadəcə videoların altında yerləşdirilən, reklam panellərinin olduğu yerə izləyicilərin doğru məlumat ala biləcəyi qaynaqların əlaqələri qoyulacaq.
Qeyd edək ki, bundan əvvəl bəzi reklam şirkətləri öz məhsullarının reklamlarının anti-vaksinlə bağlı videolarda yayılmasına etiraz bildirib, bu barədə “Youtube” şirkətinə şikayət edib. Şirkətlər tədbir görülənə qədər reklamlarını resursdan qaldıracaqlarını bəyan ediblər.